李斯特城利物浦決戰大球場

（Now 621周六晚8時30分直播）

高普：照舊用盡換人名額

在周三（19日）初賽贏波的利物浦和李斯特城，今晚在尾場的冠軍戰碰頭。今次來港「攞分」的「紅軍」領隊高普，昨日在賽前記者會上繼續展示其口才，他說：「曾經有人同我講過，想知一間球會有幾偉大，睇佢出外比賽就會一清二楚！連日嚟香港球迷都非常熱情，對我哋每一位都好支持，證明咗利物浦有幾受歡迎。香港球迷好熱情、球場內氣氛好正，賽會一切安排都好好，令我哋冇辦法唔用表現嚟答謝大家！」

初賽為「紅軍」先開紀錄的英格蘭小國腳蘇蘭基，賽後旋即成為傳媒焦點和「利迷」新寵，高普謂不會給該名小將太大壓力，但就會繼續給予機會。至於今仗會否正選上陣，高普稱會一如初賽般用盡10個換人名額，讓每名球員都有發揮的機會：「球隊後防仍有地方需要調整，我會向個別球員作出指示，大家都要繼續努力。」

馬高古積（左）積極備戰，誓要喺香港球迷面前踢好波。	李城華Dee 占美華迪	睇李城操練，球員似乎狀態一般喎。

沙士比亞：氣氛拍得住英超

李斯特城領隊格力沙士比亞，昨日在賽前記者會上表示，本來因為今晚的決賽才是球隊第二場正式的季前熱身賽，並不太在意能否封王，只要球員依部署作賽及沒有傷兵便可。但回想起周一（17日）大清早抵港，竟有不少球迷到場迎接，令他和球員深受感動，加上初賽當日球場內的氣氛與在英超無異，讓全隊上下都很想用表現來回饋所有支持者。「我好肯定決賽當日，場內支持利物浦嘅球迷一定比李斯特城多，但我哋會用表現令球迷變心，喺賽事之後變成我哋嘅球迷。」「沙翁」笑說。

雖然「沙翁」並未有正面回應決賽李斯特城的正選陣容，但他卻重提初賽當晚，隊長馬菲占士的表現出色，希望球迷可以給予他更大支持：「馬菲占士之前受傷患困擾咗一段時間，上季被外借到班士利嘅佢，其實係好有質素嘅球員。佢一直好努力去操練，陣上對自己嘅要求亦好高，希望喺球迷支持下，佢可以交出最高水準。」

英超亞洲盃今日賽程

季軍戰6:00pm　西布朗Vs水晶宮

冠軍戰8:30pm　利物浦Vs李斯特城

場地：香港大球場

門票已售罄