Marco領軍的贏五小福

以傑斯為首的「五小福」反傳統，唔坐專車，而係搭港鐵去奧海城，夠晒親民，到場後除宣傳Now TV 7月將直播的英超亞洲盃及香港世界桌球大師賽外，更入鄉隨俗，用廣東話講：「一Cue入袋」、「百戰百戰」、「加油」。

除咗「五小福」，同場仲有本港桌球名將傅家俊及「四眼Cue后」吳安儀，作為「星級魔粉」嘅Marco仲自爆對曼聯戰績相當上心︰「我自己桌球輸波，冇所謂，但當曼聯輸波，我會好唔開心！」其後大會特意安排一場「足球×桌球」大鬥法，由傅家俊及4位曼聯迷各自「的波」，與5位曼聯名宿凌空互傳鬥次數多，喺「五小福」明顯讓賽下，最終由Marco為首嘅一方勝出，認真客氣噃！

畢特（右）同尼維利兄弟喺活動中玩得勁開心。	香港另一桌球名將吳安儀都有出席活動。	出席電競活動，菲臘尼維利（右）玩得勁投入。

問曼聯前途搞到「兄弟內訌」

難得「五小福」來港，當然要問問佢哋對曼聯來季嘅睇法，不過竟然發生「兄弟內訌」，其中菲臘尼維利話領隊莫連奴有野心，而且會增兵，睇好球隊有力捧英超冠軍！不過，大佬加利尼維利就淨係講紅魔上季表現ok，但嚟緊要爭標難度高，就爭前4都唔易，仲讚車路士上季表現出色。同時，「加利佬」仲透露經過上季教華倫西亞失敗經歷之後，話唔打算再教波，專心做講波佬。至於踢到41歲先至退役嘅傑斯，就同fans分享不老之謎，話最緊要保持19歲心態，仲認為「後輩」卡域克都可以踢到四張添！

加利尼維利化身講波佬，表情勁趣怪。

入夜「五小福」去蘭桂坊飲嘢，同球迷合照都冇托手（月爭）。

連走3場 去埋蘭桂坊

話明「快閃」，5位名宿尋日喺奧海城亮相後，隨即出席在黃埔新天地的「香港競技XP」開幕禮，晚上8時又出席贊助商晚宴，之後一行人殺落蘭桂坊LKF Tower 2樓嘅Cassio西班牙餐廳消遣。據悉昨晨來港嘅「萬人迷」碧咸，仲會到場同一班紅魔老友敍舊添。而各人留港一晚後，將於今晨離港。