曼聯3億搞掂靚仔中堅

眼見同市死敵曼城連環掃貨，「紅魔鬼」曼聯亦都加快步伐，收購西班牙前鋒艾華路莫拉達就快成事，原來球會仲靜靜雞搞掂埋個中堅位！曼聯尋日喺官方網頁宣布，已經同賓菲加就收購瑞典中堅域陀連迪路夫達成協議，將會用3,500萬歐元（約3億港元）簽入呢位靚仔中堅，呢位22歲瑞典國腳周三會飛去曼徹斯特進行體測兼簽約。

索爆女友係著名Blogger

查實曼聯今年1月已經想簽域陀連迪路夫，可惜最終未能成事，不過領隊莫連奴對呢位技術型中堅非常賞識，所以夏天再向佢埋手，終於都簽到心頭好。域陀連迪路夫好波之餘外型仲勁俊朗，女友Maja Nilsson又係索爆女神兼著名Blogger，呢對金童玉女肯定會成為傳媒焦點，如果域陀連迪路夫有好表現，極有條件成為新一代「曼」人迷！