20歲法網稱后破盡紀錄 奧絲達賓高捧盃多得細威
今年法國網球公開賽，絕對係奇迹嘅一年！剛過20歲生日、世界排名47、非種子女球手奧絲達賓高（Jelena Ostapenko），之前從未攞過任何排名賽冠軍，但於今年法網女單賽事逢關過關，決賽惡鬥施蒙娜於先輸1盤、次盤又落後0比3下，戲劇性反勝奪得冠軍，不單成為首位拉脫維亞籍球手取得大滿貫桂冠，更係自1933年之後首名非種子球手奪標，打破84年嘅塵封紀錄，得到210萬歐元（約1,800萬港元）巨額獎金，這一切一切都要多得美國名將S威廉絲！
奧絲達賓高於贏取冠軍之後，前世界一姐、美國殿堂級球手金夫人，於社交網表示「剛見證一位巨星誕生」，而呢位「巨星」，對奪標表示難以置信：「能成為10年來最年輕嘅法網單打決賽球手，本身已經非常值得紀念，20歲就攞埋冠軍，真係諗都冇諗過。我細細個睇電視，就已經好想攞法網冠軍，估唔到咁快就有呢個機會。」其實職業生涯首個冠軍就勇奪法網這「奇迹」並非首次，巴西古爾頓於1997年亦都試過，而佢當年奪標嗰日，咁啱就係Jelena嘅出生日子，世事冥冥中自有主宰。
迷上S威廉絲棄舞從網
出生於只有200萬人口嘅拉脫維亞，父母同為「體育人」，令小妮子相信小國一樣可以出產世界級運動巨星。由於媽媽係網球教練，Jelena自小已跟住媽咪出入網球場，並由5歲起開始打波。除咗網球，佢仲係「舞林天才」，識跳10種唔同嘅標準舞，曾經於國內奪得標準舞比賽冠軍。直到12歲，小Jelena迷上「細威」S威廉絲，才決定追隨偶像步伐，專注在網球發展，而「奧媽媽」順理成章成為佢嘅啟蒙教練，直到今年先換上前法網雙打冠軍嘉維姬絲當教練，而身為職業足球員嘅「奧爸爸」，就幫佢做體能訓練，得到家人全力支持，加上舞蹈根底，令奧絲達賓高進步幅度大於同齡對手。
喪袋1,800萬獎金
2012年奧絲達賓高轉打職業，並代表拉脫維亞打比賽，兩年後成為溫布頓青年組女單冠軍，15年打入溫布頓及美網第2圈。到今年澳網，佢成功打入第3圈，而到法網以非種子球手身份參賽，奇迹奪得冠軍，得到210萬歐元（約1,800萬港元）巨額獎金，比Jelena之前5年來累積的130萬美元（約1,000萬港元）獎金，一口氣翻了超過1倍！如果Keep得住呢個進度，將來天價獎金肯定陸續有來。