法網發生罕見非禮事件，法國21歲球手夏穆（Maxime Hamou），竟然於電視直播期間，對女記者Maly Thomas又錫又攬仲疑似胸襲，行為令人髮指！Maly事後表示，如不是顧及專業形象，定會立即「兜錘打」夏穆。雖然夏穆之後向Maly道歉，但法網賽會對夏穆強烈不滿，已撤銷其參賽認證。
現時世界排名287的夏穆，於法網外圍賽連贏3場賽事，取得外卡參加主賽圈比賽，但首圈就不敵烏拉圭球手古華斯出局。雖然輸波，但夏穆情緒依然極度高漲，賽後接受Eurosport女記者訪問時，更露餡變身大淫狼。Maly趨前欲訪問夏穆時，他即時伸出左手搭住Maly膊頭，之後更老實不客氣錫落Maly個頭度。Maly連條問題都未問完，夏穆又再錫多啖，手指更喺膊頭唔規矩摸來摸去。
之後夏穆終於肯答問題，一答完之後就錫向Maly，後者想走，他就用力箍她回來，隻手還疑似於Maly胸前游走，女記者忍無可忍甩開夏穆隻手逃出魔掌。事後Maly話：「如果個節目唔係現場出緊街，我一定即時一拳打埋佢度。」非禮事件引起各界嘩然，法網賽會決定取消夏穆今次比賽的成績。夏穆其後在社交網道歉，但已無補於事。
昨日賽果方面，36歲美國老將V威廉絲於次圈以6比3及6比1勇挫日本球手奈良久留美，至於另一「三字頭」澳洲女球手施杜素，則以6比2、7比6（8比6）險勝菲立根絲，第3圈將對馬蒂克。馬蒂克昨以7比6（7比5）、7比6（7比5）爆冷淘汰兩屆溫布頓冠軍姬維杜娃。