訪紅軍學院 同謝4擦身而過
【高詩琦 利物浦直擊】小記入場直擊利物浦大勝米杜士堡3比0，贏波攞到下屆歐聯入場劵，感受到紅軍球迷興奮嘅氣氛之餘，早一日更提早隨團參觀擴建咗嘅晏菲路球場，亦去到即將成為紅軍總訓練基地嘅利物浦足球學院。
入到呢個將會擴建成利物浦全新訓練中心嘅基地，最意想不到嘅係，小記一步出旅遊巴，就見到有架私家車駛緊入嚟，心入諗謝拉特依家喺度做教練，會唔會係佢？點知望下前座乘客位，居然真係「神奇隊長」！「謝4」當時喺車入面似乎諗緊公事，由於事發突然，小記連相機都拎唔切，佢嘅座駕已經轉咗入停車場，小記惟有為佢「人去車空」嘅座駕影番張相留念啦。
5.1億新青訓基地2019啟用
講番足球學院先，雖然係青訓基地，但共有12個球場，當中有4個係正規11人場，利物浦亦即將投資5千萬鎊（約5.1億港元）擴建，畀一隊同梯隊共用，放棄歷史悠久嘅米活訓練場，預計會喺2019至20球季前啟用。「渣打5人足球賽」嘅參賽者，就喺其中一個仿真草球場練習，每兩隊一組，各由一位利物浦足球學院教練負責引領球員作「紅軍式」特訓，名宿阿倫堅尼地亦落場指導，同特別鼓勵參賽者。
「渣打5人足球賽」嘅香港代表Alpha Go成員之一莊惠強話，呢個機會千載難逢：「我好細個已經係利物浦Fans，有機會喺呢個足球學院練波，感覺好似變咗個利物浦球員，好似教練咁講，呢份回憶一生人都唔會忘記！」今次渣打銀行大中華及北亞洲地區公共事務、品牌及市場推廣主管莫毅信（Esmond）亦飛到利物浦，支持紅軍多年嘅佢更加入場睇利物浦對米杜士堡嘅煞科戰：「我支持利物浦已經好多年，從來都只喺電視睇直播，今次有機會喺紅軍主場睇煞科戰，實在好開心！」