入場球迷一律搜查 川崎嚴防太陽旗

川崎前鋒因作客水原藍翼一場亞冠盃，有球迷喺看台懸掛象徵軍國主義嘅太陽旗，被亞洲足協判罰閉門作賽一場（緩刑一年）及罰款15,000美元（約11萬7千港元）。川崎管理層對此雖然深深不忿，準備去信AFC質詢處分理由，不過佢哋依然好擔心有唔生性嘅Fans繼續玩嘢，所以由上場日職主場數新潟天鵝3蛋場波開始，規定觀眾入場都要查袋，防止同類事件再發生，明晚對東方龍獅自然會更加嚴格執行，以免閉門令馬上生效，甚至招來更重刑罰。

兩中場大將傷愈誓取3分

目前川崎喺G組排第3，落後水原藍翼1分，小組煞科戰除必須擊敗東方龍獅，更要期望廣州恒大淘寶戰勝或打和水原，才能取得出線席位，因而求勝欲望極強，也對政治問題格外謹慎。賽前川崎收到喜訊，中村憲剛、家長昭博兩名中場大將，都已傷愈復操，並曾經喺對川崎青年軍嘅練習賽披甲，中村甚至放言希望喺亞冠盃同家長昭博並肩上陣爭勝，呢個對東方龍獅嚟講當然唔係個好消息。