今日到我同大家分享下自己嘅事，從國內返香港已經一個月了，回來嘅原因係為咗照顧家人，始終仔女年紀仲細，加上實在太掛住香港，所以先同梅州客家提早解約。
其實亦好高興能夠返番前球會香港飛馬工作，雖然飛馬經歷過唔同時代，但始終喺2009飛馬創立嘅時候，自己都係球員之一，之後轉型做教練亦喺飛馬做助教，所以對球會有一定感情同認識。
加盟香港飛馬其中一個目的，就係希望喺領隊奇雲邦特身上學嘢，佢喺英格蘭球壇征戰多年，所累積嘅經驗絕對係一個教練嘅「財富」。難得身為前輩嘅佢，好樂於過料畀我哋幾位後輩，滿足到我「邊做邊學」嘅目標。
香港飛馬助教 楊正光