19歲胡晉銘變身萬能俠
每到4月考試季節，如果美斯生在香港的「潮文」又是時候無限loop。曾在「我的志願」一欄填上足球員，卻被老師囑咐要好好讀書，香港飛馬19歲小將胡晉銘的童年經歷，如同港孩們的集體回憶。站在夢想與現實的交叉點，「阿銘」咬緊牙關兼顧足球與學業，今季幾乎場場踢足冇失拖，仿效偶像謝雷變身「萬能俠」，能夠一次過滿足晒3個願望，不外乎夠堅持。
「夢想看似不切實際，其實很有意義」，對於曾在前年DSE中文「炒粉」的胡晉銘而言，今時今日重新再寫多一遍，應該更加鏗鏘有力︰「有時我都好羨慕隊友練完波就去做gym，呢啲先係職業球員應有生活，但係行得呢條路，唯有頂落去。」訪問約在城大九龍塘主校園，就讀康樂及旅遊管理副學士的阿銘卻竟然「唔多識路」:「一來課堂多喺九龍灣新大樓，二來而家點都係以足球為先，返學只係上堂，唔會參加課外活動，有時間都用嚟休息。」
想學謝雷前後都踢得
性格內向的阿銘自言從小到大也很「宅」，惟獨上到球場判若兩人。小學一年級已在父親薰陶下加入足球興趣班，我的志願一欄例必寫上足球員，卻換來老師好言相勸︰「運動員生涯短暫，呢啲說話聽咗十幾年。升到中學後更加明顯，因為讀書，青年軍好多時練波唔齊人，唔多唔少影響到意志力，好彩最後冇放棄到。」小時候曾當球僮踏上旺角大球場草地，幻想有朝一日一如偶像謝雷瞻前顧後，今季竟能在港超正面交鋒，總算實現夢想第一關。
成長在香港足球青訓雨後彩虹年代，從灣仔南華的陳炳安、陳浩然、潘耀焯到後來太陽飛馬青年軍的「牛丸」陳婉婷，阿銘身邊恩師均大有來頭，無奈昔日並肩作戰的好兄弟已各奔前程。曾經猶豫過的阿銘選擇堅持︰「有諗過不如放低學業，但始終香港風氣要求點都要有張大學畢業證書傍身，唔讀書好似好蝕底。最辛苦係高中時，連同港青及球會賽事，一個禮拜有5日放學後要練波，返到屋企已經冇時間做功課，但反而促使我學會揸緊信念，因為我實在太愛足球，愛到唔識形容。」
父親撐場成奮鬥動力
愛字不是單憑用口說，家住東涌的阿銘每早7時起床，熬足幾程港鐵到跑馬地練波，下午又要趕去上堂，卻未試過遲到早退。足球路漫長，幸而阿銘不是孤獨一人︰「Daddy由青年軍開始每場比賽都嚟捧場，而家仲會討論場上表現，比以前多咗話題，亦都因為足球，可以早啲接觸出面世界，比以前識得同人溝通。」人生總要取捨，面對4月接踵而來的考試與功課，還有為香港飛馬備戰菁英盃決賽，阿銘已學會平衡有道︰「唔好做deadline fighter，保持休息及均衡營養。以前我好懶飲水，但為保狀態，而家識得去增添水分同碳水化合物。」見微知著，誰說年輕人就是任性？
文︰徐嘉嘉