本地有好多足球發燒友，發夢都想香港波可以搞得起，仲有朋友做埋業餘球員踢港甲、港乙，雖然唔係職業，但佢哋都好尊重呢個身份，私底下好落力咁操，呢份精神，梗係值得敬佩啦！好喇，有心人就大把，但點解發展速度硬係咁緩慢呢？制度僵化、個別人士做嘢官僚矯枉過正，就一定有礙足球發展。
波男尋日去到沙田曾大屋遊樂場，諗住捧吓場支持晨曦對花花嘅港甲賽事，依家晨曦排緊榜首，花花就排第4，呢場波有睇頭㗎。場波本身下晝6點半開波，通常有15分鐘時間畀球員熱吓身，波男6點20分到，乜解究兩班波仲喺場外、一個二個冇喱表情嘅？行埋去吹兩句，先知原來場監未嚟，球員冇得入場，亦都唔知幾點可以入場。喂！其實你哋係甲組球員，個個都熟口熟面，入去等都得啩？球員無奈咁話，康文署揸正嚟做，總之場監一日未到，都唔使旨意入去。
雙方球員等到躁，原來場監都仲記得自己職責，6點31分終於嚟到。雖然佢即時耍晒冧、畀番球員15分鐘熱身先開波，但球員之前又凍又躁，心情點都有影響啦。
老實講，有時意外嘅嘢大家都唔想，場監遲到已經係事實，只要周邊嘅人肯彈性啲去處理問題，呢個世界人人都會開心啲。就好似今次咁吖，康文署職員明知現場廿幾三十人，個個着晒整齊波衫、又有幾個球證喺度，可以去了解吓件事、跟手Check吓賽程，知道球員唔係白撞，就可以早啲放人入場啦。制度係死，人係生嘅，多啲思考畀啲Common Sense，咁就皆大歡喜啦！