陳肇麒首騷搏到盡！
無論你是「讚好」抑或「負評」，「陳7」陳肇麒舉手投足也能成為香港球壇熱話。季中由南華轉投香港飛馬，從受盡注目的7號球衣，換上初出茅廬的18號，喻意重新出發的「陳18」仍渴望再闖高峰，今午5時30分於「富力地產菁英盃」8強首度披上新戰衣登場，在青衣運動場惡鬥標準灝天，誓助香港飛馬邁向衞冕目標！
同樣是紅色，球衣上沒有繡上4粒星的百年老店榮耀，活力掛帥的香港飛馬隊徽，已足讓趕及在轉會窗關閉前加盟的陳肇麒，煥發久違了的新鮮感。「香港飛馬陣中年輕球員態度積極正面，最重要係不論球員、教練團同管理層之間嘅合作關係充滿信任，一切好似有種煥然一新嘅感覺。」
重遇奇雲邦特即送高帽
除了昔日在南華合作過的管理層及迪亞高、利馬等外援隊友，香港飛馬領隊奇雲邦特對「陳18」而言也不陌生，2009年遠赴熱刺跟操期間，正是由「KB」主持訓練。「香港球員能力唔似熱刺咁高，但係奇雲邦特訓練內容同熱刺時相若，每次訓練前準備充足，令到訓練好快進入高強度狀態，而且佢習慣喺訓練完畢後都會幫前鋒加練射門，唔似有部分教練會叫埋後衞一齊射波。當日有幸同羅比堅尼等熱刺前鋒一齊練射波，點都會有一定幫助。」
從熱刺學成歸來的「陳7」，幾乎逢射必入，更於該季榮膺香港足球先生。無奈近季的他愈踢愈後，上半季在南華只入1球，有望在香港飛馬回歸正前鋒位置的他，期望與新拍檔梁嘉恆擦出火花：「嘉恆身形、速度與射術兼備，我哋平時練波夾得唔錯，當我移後攞波時，佢就入楔埋門，兩個可以互補不足。佢只得24歲，仲有潛質未發掘，今次過嚟香港飛馬，除咗希望幫到球隊捧盃之外，更渴望可以幫到一班後生仔進步。每個球員都會經歷唔同階段，但我仲未係時候步入黃昏！」
菁英盃銳意提升年輕球員上陣機會，「陳18」在此與年輕隊友並肩展開新里程，可說別有意義。香港飛馬季中還羅致了李毅凱、楊賜麟及18歲小將林樂勤，當中除「賜B」因曾在首圈上陣無緣倒戈，其餘新兵皆可悉數上陣。
東方龍獅旺角再鬥R&F富力
至於在港超領先的東方龍獅，則會於2時30分再在旺角場鬥R&F富力，東方龍獅在周四晚的聯賽補賽曾大勝對手6比1，主帥陳婉婷已明言會收起主力休息，季中加盟的吳偉超有望正選登場。
