羅意庭首派利是最緊要Happy

親手寫揮春雞手鴨腳

即將踏入雞年，上年榮升「老襯」的羅意庭首次派利是，他坦言感覺十分特別：「以前逗利是會開心，今年輪到派利是，將自己的祝福同喜悅分享畀其他人，見到親朋戚友收得開心，自己都派得特別開心。」踏入農曆新年，除了封利是，今年「阿庭」與老婆「阿Lo」亦搞搞新意思，自己親手提字寫揮春布置新居。平時場上打波有型有款，但拿起毛筆的「阿庭」雞手鴨腳，這種文靜的活動實在不適合籃球運動員。

「由第1年打南華，到依家隊友都轉咗兩、三批，見證住呢十幾年南華嘅轉變，依家自己嘅角色就好似一個老將，帶住一班年輕球員去比賽。」效力南華已經踏入第12年，看盡多年來球隊的高低起跌，羅意庭表示，與球隊已經有不可分割的感情。

平日練波後，一班球員都會「拉隊」共進晚餐，圍繞的話題總離不開籃球。大日子更加有聚餐，球員和教練一起輕鬆討論球隊表現，增添凝聚力！團結是南華籃球隊最大的財富，亦是球隊其中一個優勢，羅意庭說：「南華就好似一個大家庭，就算有時遇到挫折、傷病或者輸波，士氣可能有好低落嘅時候，但大家都可以並肩度過，呢個過程對我嚟講有好深體會，我好希望可以將對呢種對籃球嘅熱情以及團結精神承傳落去！」

放大圖片	中鋒惠龍兒：新一年希望南華可以成為本地籃壇3冠王，自己再衝CBA亦可以成功！	小前鋒余理洋：我的所有家人和朋友最重要身體健康，南華所有隊友都可以遠離傷患！

夜戰工商盃望大勝收爐

今晚將上演工商盃4強賽事，南華迎戰標準錶針，球隊當然希望在「收爐戰」大勝一場，殺入決賽，為雞年首個本地錦標打拚。「展望我哋今年無論工商盃、銀牌，以及聯賽都可以拎到冠軍，呢個目標一直都不變！」工商盃後，在3月就會緊接銀牌開季，南華有機會在第2場就遇上兄弟班南青，新一年本地籃壇比賽精彩可期，各位「紅軍」球迷當然不容錯過！