體壇戀咁嚟擦出愛火花
福原愛江宏傑秘密結婚：
日本乒乓球名將、綽號「瓷娃娃」嘅福原愛喺9月初被爆已於東京登記結婚，結果等到21日及22日喺東京同台北召開跨國記者會宣布婚訊，會上福原愛更展示由同是乒乓球手的丈夫江宏傑親自設計的鑽戒，並親密互稱對方為「老公」與「老婆」，好Sweet呀！
福原愛與江宏傑自小認識，但直到近年才進一步交往，兩人今年4月被媒體爆出已經相戀，雖屬於遠距離戀愛，但經常往返東京和台灣相聚。今年8月里約奧運開幕禮上，兩人一起出現在會場，被傳媒首次拍到合照。江宏傑喺里約奧運後正式向福原愛求婚，但於殘奧會結束後先公布喜訊。
斯圖加特拍婚照別具意義
江宏傑10月前往德國進行訓練，福原愛亦有隨隊更於斯圖加特拍攝一系列夢幻婚紗照，呢個地點對兩人嚟講有特別意義，因為斯圖加特正是佢哋宣布婚訊後首個共同生活嘅地方，象徵幸福起源以及一齊訓練嘅甜蜜回憶。兩人婚紗照中有一齊打乒乓球嘅活潑剪影，亦有身穿禮服於德國古堡前展示經典風華，每一張照片都將新婚幸福洋溢其中。江宏傑將於2017年1月1日喺台北晶華酒店舉辦婚宴，正式迎娶福原愛，再於2月在東京迪士尼舉行婚禮。
秦凱跪地求婚冧爆何姿
2016年里約奧運焦點場面之一，必定數到何姿為中國跳水「夢之隊」取得女子3米板銀牌後，男友秦凱突然手持戒指，單膝跪地公開浪漫求婚，當時何姿開心得流下感動的淚水回答「我願意」，有關失落金牌的遺憾，可說是已忘記得一乾二淨。
秦凱在4年前的倫敦奧運男子單人3米板決賽，痛失金牌後被何姿以「愛的抱抱」安慰，戀情隨之曝光。雖然秦凱在里約奧運的男子雙人3米板僅得銅牌，女友何姿也只能以銀牌結束巴西之旅，但兩人在無數觀眾見證下收穫愛的祝福，絕對不枉此行。
事實上，何姿被英國廣播公司BBC懷疑在鏡頭前勉強答應求婚後，一直用行動反擊「唔願嫁」傳言，不時在公眾場合與秦凱攬攬抱抱晒恩愛，又試過在微博貼上婚紗相，證明好事近，難怪秦凱說：「贏了你，輸了全世界又如何！」
C朗轉口味Sales妹變灰姑娘
浮誇C朗今年戀情轉口味，同平民女Sales譜出「灰姑娘」故事！C朗上年初同名模伊蓮娜分手後，感情生活依然多姿多采，一度傳佢中途「轉Gay」，跟住又話同前西班牙小姐冠軍德西蕾撻着。估唔到「真命天女」原來係馬德里一間名店嘅售貨員Georgina Rodriguez，證明真愛可跨超越一切，將兩個唔同世界嘅人拉埋一齊。
易容拍拖保護戀情
C朗似乎已厭倦同名模女星交往，轉玩低調，將同Georgina嘅戀情收到好密實，11月同新女友去巴黎迪士尼樂園玩，仲易容戴假髮笠頂帽，但一樣被傳媒認出。戀情曝光後，兩人先至大方行街拍拖去睇演唱會。原來Georgina正職係馬德里嘅名店售貨員，即使釣到金龜C朗，但仍然照常返工自食其力，形象親民。
可惜由於不斷有傳媒前往追訪同偷拍Georgina，令到鋪頭變成景點，老闆可能覺得呢份工太委屈「C朗嫂」，決定炒佢魷魚，畀機會Georgina專心做「少奶奶」等C朗養。依家Georgina順理成章做「跟得夫人」頻頻入場睇C朗比賽，至於呢個球壇「灰姑娘」故事可唔可以開花結果，大家拭目以待。
曼聯衰仔各自偷食
講到球壇偷食兵團，曼聯認第2冇其他隊敢認第1。好似陣中「新亨利」安東尼馬迪爾，佢拋妻棄女，搭上真人騷女星Melanie，搞到老婆Samantha患上抑鬱症，兩個月來暴瘦10公斤，認真冇陰功。至於隊友路爾斯華倫西亞本來形象正面，係顧家好好先生，但原來只係假象，被爆透過Instagram溝掂1位叫做蘇菲亞嘅挪威護士。呢位厄瓜多爾國腳更送波飛及訂埋酒店，邀請蘇菲亞去英國入場睇波，賽後更翻雲覆雨狂歡3日，形象盡毀。
有個索爆女友嘅「神龍」迪基亞亦唔好得幾多，2012年為西班牙U21服役期間，孖住同胞蒙尼恩強姦未成年少女，雖然女方拒絕提供性服務，但因為有人捉實佢作出恐嚇，令佢被迫就範，呢單嘢爆出之後，幾乎令佢冇得打6月嘅歐國盃。講到家有嬌妻嘅馬高斯盧祖，仲衰到喺網上呃女仔嗰陣，沙膽到用「何B仔」照片約炮，諗住單刀直入氹人上床，點知張相近日喺網上瘋傳，今次佢真係水洗都唔清！
尼馬愛的抱抱翻撻般娜
外表成個花花公子嘅巴西球星尼馬，原來都係癡心情長劍，雖然身邊出現過唔少緋聞女友，不過喺今夏奧運足球決賽，竟然爆出尼馬同舊愛般娜重燃愛火！即使雙方都冇證實復合，但尼馬喺實現贏奧運金牌夢想後，即場走去觀眾席同般娜擁抱，呢一「攬」已經勝過千言萬語啦！
當年尼馬同般娜分手，般娜只係一個天真少女，但佢進軍電視圈後迅即走紅，喺人氣劇集《過去不能重來》入面更有露點嘅超性感床戲，依家般娜已經係巴西新一代性感女神，人氣絕對唔差得過尼馬，所以呢一pair家陣响當地畀人叫做「Brumar」。
美人魚歐鎧淳鍾情運動員
‧「美人魚」歐鎧淳於奧運人紅連男友都被起底，當時男友是退役水球代表隊隊員Jonathan陳浩軒，然而11月被踢爆，原來兩人已於奧運後分手，而且迅速與香港棒球代表兼《點五步》主角之一胡子彤撻着。
24歲的歐鎧淳在今屆奧運擔當持旗手，因標致臉孔被網友封為女神，仲連男友都被起底，但因二人聚少離多，最終分手收場。回復單身的淳淳BB當然引來狂蜂浪蝶，最後仍然情歸運動員，接受憑《點五步》入圍角逐台灣金馬獎最佳新演員獎的胡子彤。
柿谷3條8宣布做老襯
‧剛剛帶領大阪櫻花升上日職嘅前鋒柿谷曜一朗，喺12月8日晚上8時透過女友、女優丸高愛實嘅個人網頁公布婚訊。身為櫻花8號仔嘅柿谷，專登選擇12月8日晚上8點宣布婚事，就是貪「888」時間容易記兼好意頭。身高1米64嘅柿谷太太丸高愛實，1990年6月12日生於東京都，係影星兼寫真模特兒。2009年丸高愛實參加選美比賽「Top of gravure」，於過萬名報名者中脫穎而出名列冠軍，被評為「最受關注偶像人物」。呢對新人都係26歲，拍拖兩年半，計畫到馬爾代夫旅行結婚。
基迪拉女神愈換愈索
‧德國國腳基迪拉天生「桃花命」，兩年前同德國超索Model蓮娜嘉琪分手後，大批球迷都話佢暴殄天物、身在福中不知福。不過基迪拉溝女能力同眼光都一流，今年成功搭上另一位德國超級模特兒Kimberley Mens，兩人被影到喺都靈街頭拍拖，呢位Kimberley論樣貌同身材都唔差過蓮娜嘉琪，同屬全球頂尖美女行列，基迪拉飛完一個女神又換另一個女神，真係要寫個服字畀佢！
梅萊榮升嗲哋旺足成年
‧英國網壇一哥梅萊今年成為當旺爸爸，自2月太太莎絲幫佢生咗可愛B女之後，事業勇達巔峰，除咗職業生涯第2次奪得溫布頓冠軍之外，更加喺里約奧運完成史上首次男單連霸，去到ATP年終賽更擊敗老對手祖高域，首次封王兼榮升史上第26位年終「1哥」，旺足成年旺到冇朋友。