咖喱仔開火射瓜速龍

勇士「三巨頭」史堤芬居里取得28分之外、尚貢獻7個籃板同7次助攻，杜蘭特有22分、17個籃板同7次助攻，奇利湯臣亦攻入21分、6個籃板及2次助攻，協助勇士重響勝鼓。作客嘅速龍有主將迪羅辛獨取29分、5個籃板同6次助攻，職業生涯累積10,290分超越「龍王」保殊，成為隊史得分最多球員，可惜速龍始終輸波。

另外，史堤芬居里幾年前答應慈善基金會Nothing But Nets，每入1個三分球就捐出3個蚊帳，幫助非洲小朋友對抗瘧疾，佢對速龍賽前更決定在1月1日前的比賽加碼，每個三分球捐9個蚊帳，希望用佢嘅招牌遠射，引起球迷關注加入行善行列。

CP3撐唔住快艇4連敗

同日，快艇作客以98比102不敵塘鵝，基斯保羅（CP3）傷愈復出取得21分、8個籃板同6次助攻，但由於格芬同列迪克未康復繼續缺陣，即使CP3有好表現，都阻止唔到快艇4連敗。塘鵝則由「一眉」安東尼戴維斯拿下20分、6個籃板同1次助攻，帶領球隊取得3連勝。