唔做勝利球迷

「今場踢得麻麻，上場精彩啲，唔緊要，下場再嚟過！」支持和富大埔多年的Eric一邊打鼓，一邊看着球隊在足總盃首圈落後南華5球，與看台上的球迷老友互相勉勵。下次下次，縱然未是勝利那一次，鼓聲卻從未間斷。「點解支持大埔？就係因為大埔兩個字。」即使是在1990年代的球市興旺高峰，Eric也甚少入場觀看本地波，只因抱着「自己區隊自己撐」心態，便與大埔緣定10年。「大埔有份特別凝聚力，好似英超球迷好多時會支持番自己地區球隊。大埔球迷好多都好忠心，唔會因為降班就撐第二隊。」

珍姐風雨不改跨區支持

大埔2013年悲情降班後迅即重拾升班資格，煞科戰過百名球迷湧入廣福公園的墟冚場面仍記憶猶新，無奈僅僅一季又再護級失敗。今次再戰港超，面對九巴元朗及冠忠南區等地區新貴來勢洶洶，和富大埔淘汰南華勇闖銀牌4強，上半季主場亦保持場均900人入場，縱未如當年初上甲組技驚四座，也算是中規中矩。「勝利球迷邊個唔想做，做唔到咯，做個開心球迷都好啦。」除了「生招牌」Lulu，只要有入場支持和富大埔，也必定會認得她的響亮聲音……年過六旬的「珍姐」。

「珍姐」家住大窩口，與大埔運動場相距不遠卻亦不近，10年風雨不改跨區支持，說到底，還是那份同喜同悲的人情味。「當年因為做義工認識大埔球迷會主席入場，最深刻係佢教學生睇波唔好講粗口。嗰時阿智（陳旭智）、阿興（呂志興）20歲出頭，大家會一齊落區派傳單，依家個個開始有自己家庭，感覺好似睇住佢哋成長。」

Chris教9歲Grace體育精神

和富大埔今季加入不少青春新血，縱然人面全非，無阻「珍姐」繼續支持：「球隊要有新人先至有活力，不過我最鍾意都係我哋『情富』黃耀富，上次贏波佢話表演除褲，真係畀佢笑死。」

這天的黃耀富未有落場，單是在場邊熱身已能令「珍姐」開懷大笑，足球的魅力，從來無分年齡界限。只得9歲的小女孩Grace眼看大埔輸波不禁嘴扁扁，卻不忘高舉打氣頸巾支持球隊昂首離場。2歲便隨父親Chris入場打氣，Grace從一班大埔粉絲中「睇住佢大」。爸爸Chris安慰說：「輸贏唔緊要，最想囡囡學習和富大埔嘅體育精神，就算落後5球都要繼續去拚，最終總可以追番1球。」誰說香港球迷只愛勝利？

文／圖：徐嘉嘉