咖喱仔東岸射到西岸球迷O嘴
勇士昨晨作客以120比83擊敗溜馬，趁對方有保羅佐治因傷缺陣完成8連勝！史堤芬居里取得22分、6個籃板同6次助攻，杜蘭特亦有14分、11個籃板同6次助攻，另一射手奇利湯臣更貢獻25分，輕鬆大勝過程唔算太精彩，不過「咖喱仔」喺第2節結束前，曾經喺勇士後場3分線內跳起，臨落地前出手扔向對面籃框，最後竟然穿針射入，搞到全場球迷O晒嘴。雖然球證翻查片段發現史堤芬居里起手前計時器已響起，判入球無效，但能夠射入咁變態嘅遠射，證明「咖喱仔」百步穿楊技術堅恐怖。
快艇孖寶玩謝速龍
另外，快艇喺主場以123比115擊敗速龍，開季後錄得13勝2負，繼續喺NBA排名榜高踞第1位；兩大當家球星基斯保羅同格芬分別在外線及「鋤樽」搶分，表現持續強勢，不過快艇連贏3場後，需要迎接連續6場地獄作客之旅，包括要造訪上季總冠軍騎士，遇上今季最大考驗。
今仗快艇雖曾經於第1節被速龍反超前比數，但基斯保羅取得26分、3個籃板同12次助攻，加上格芬取得26分、7個籃板同7次助攻，最終快艇成功報捷。速龍球星路維即使取得27分、6個籃板同7次助攻，迪羅辛亦攻入25分、4個籃板同7次助攻，都阻止唔到速龍2連敗。