伍家朗黃永棋大圍食好嘢
黃永棋、伍家朗先後成為香港羽毛球一哥，亦是兩代「林丹殺手」，2人在羽球路上夠晒相似，球場上亦是努力、認真一族，但場外他們都喜歡找美食減壓。在香港公開羽毛球錦標賽前夕，兩位球手變身導遊，帶大家在體院附近捐窿捐罅「食好嘢」，並談談他們的備戰工夫！
作為職業運動員，在外地比賽的時間十分漫長，經常飛來飛去，生活看似多姿多采，但對黃永棋及伍家朗來說，在外地比賽並不有趣。「最耐試過喺歐洲逗留兩個月打國際賽同聯賽，歐洲生活感覺係幾舒服，因為步伐冇香港咁快，但食得太多西餐，會好掛住香港小食。」伍家朗表示，除了魚蛋及燒賣外，今次同大家推薦大圍港鐵站附近的手撕雞腸粉；腸粉是香港著名地道小食，雞肉配上腸粉和麻醬，吃起來很有層次。
說到吃東西，大家可能不知道，黃永棋其實是專家：「細個屋企開印尼餐廳，所以比較鍾意食嘢，有時打波畀自己好大壓力，就會周圍搵嘢食。」每次在外地比賽後回港，黃永棋第一時間食番碗沙嗲牛肉麵，不過今次他所推介的，同樣是大圍美食海膽手卷。「以前好鍾意食到好飽，感覺好滿足。但依家要控制體重，令球場上有更好表現。」難怪他會推薦日本菜，清淡而不油膩。
期望主場威番鋪
國際羽聯超級系列賽最後1站今年會在香港舉行，難得可以留在香港一段時間，除了找黃永棋和伍家朗做美食導遊，當然要來談談他們的備戰情況。去年伍家朗在香港公開賽擊敗林丹，一舉成名；雖然今年林丹未有參賽，但他亦訂下一個目標。「首先希望可以打入8強，再逐步打上去。打完奧運後連續幾個公開賽都打得麻麻，法國站終於打到入4強，希望可以繼續突破。」不過「家朗」在16強有機會硬撼5號種子田厚威，之前4次交手都落敗，伍家朗指出：「每場分數都好接近，但就係贏唔到，好大程度係信心問題，今次主場希望會有優勢！」
近半年狀態回勇，黃永棋在南韓站擊敗田厚威入4強，去到丹麥再贏師弟伍家朗，回到香港當然更加醒神：「我比較鍾意主場比賽，唔需要適應時差同天氣，已經係一大優勢！」身處上線的黃永棋，今次在香港站會先後在16強和8強遇上兩位種子球手，但他亦希望循序漸進，至少打入8強！
圖/文：王藝霖