黎耀昌向來低調，但他的內斂光芒，早在10年前已被「曾教練」——女友Yuki「慧眼識英雄」，情定傻氣外表背後的赤子之心。
黎耀昌不愛打扮、只愛打機不愛蒲，以為他是毒男？仍屬流浪「執波仔」的他，已俘虜了前來睇波的Yuki：「嗰場波佢踢得一陣，但我覺得佢幾靚仔，所以喺球場門口等佢。仲記得佢嗰時因為要幫球隊職員收拾裝備，係最遲走一個。」靚仔定義見人見智，不過能夠攜手走向第一個10年，「阿昌」自然有其過人之處。
「咪睇阿昌外表戇居居，其實處事好成熟，待人接物圓滑得嚟又真誠，最緊要係善良純品……」隔着電話也Feel到Yuki的甜絲絲！苦等10年方有出頭天，「阿昌」多得「教練女友」從旁鞭策：「佢叫我做『曾教練』！佢有啲懶，我會忍唔住『哦』佢，有時佢問我場波踢成點，我都係畀6、7分佢，等佢唔好自滿。」倒戈南華的神勇表現，令Yuki難得給滿分，不過接踵而來的關注卻讓「阿昌」換來壓力，Yuki亦甘苦與共：「以前冇人理佢，一場波令佢多咗好多訪問，有時佢都苦惱接唔接好。我同佢講踢波有人識係好事，最緊要做番自己本分。」