黎耀昌港超黎耀祥
3屆視帝黎耀祥，香港觀眾無人不識；「牛奶仔」黎永昌，老一輩球迷仍然津津樂道。黎耀昌是誰？兩周前外借倒戈南華如同球王上身，職業生涯首次梅開二度，facebook洗版效應一時無兩。10年綠葉翻身變主角，理應吐氣揚眉，「阿昌」卻雲淡風輕：「我從來唔覺得自己唔抵，與其畀人捧到名大於實，我寧願做番實大於名嘅小配角。」大智若愚，終可後發先至。
一個金球引來瘋狂洗版，更令冷落他的前任南華看守教練列卡度「一燉再燉」，即使未有入選最新港隊名單，黎耀昌，毫無疑問是這陣子最紅港將。倒戈入波，其實對「阿昌」而言並非新鮮事，早在效力天水圍飛馬首季，便曾在香港大球場離門40碼轟破母會流浪大門：「當時冇直播，講番起都冇人記得。」
「球圈現實寧繼續批評我」
花無百日紅，縱橫球圈10年，「阿昌」自然心領神會：「我唔想再喺Rambo傷口上灑鹽，球圈始終好現實，只要我下場踢得唔好，又可能會話我只踢得1、2場好波。讚美聲音好易令人沖昏頭腦，我寧願大家繼續批評我。」
自幼已在摩士公園扭遍街場無敵手，小學對手更要找來專人「招呼」，明明可以自信過人，他卻偏偏戰戰兢兢，就連兒時夢想也只是做Sales（售貨員）！沒有志氣？他卻另有想法：「做Sales好失禮咩？我相信以我口才，一樣可以做到Top Sales。我算容易滿足，外界覺得我十幾年嚟浮浮沉沉，但我從來唔覺得自己唔抵，只係表現唔夠穩定。」
鵪鶉仔兒時夢想做Sales
「阿昌」曾是2009年東亞運金牌成員，無奈逾半隊友早已淡出球圈。被視作年輕球員多年的他，今年亦已28歲，說他大器晚成，不如說是心態決定命運：「踢嚟踢去都踢唔到上一線，我畀過最後時限自己，不過當年喺黃大仙表現唔錯，當時人工唔算高，惟有教波幫補，後來仲畀南華賞識。追夢同生活要平衡，你踢到幾多，人哋就畀幾多你，選擇咗就唔好埋怨；又好似香港隊咁，入籍球員的確係有幫助，想入選惟有踢得比辛祖同艾力士更好。」
怨天尤人與圖強自決，「阿昌」選擇後者，主動向南華提出外借，重返母會理文流浪。10年人事幾番新，理文流浪今季換上新氣象，「阿昌」不再是當日在朋友三催四請才敢投考青年軍的「鵪鶉仔」，不時以身作則鼓勵年輕隊友。「贏南華後收到好多message，最難忘係偶像兼老友李康廉提醒我要謙卑。依家我變咗少少，唔係因為得咗，而係對自己更加有要求，練波時應玩則玩，唔再好似以前咁成日嘻嘻哈哈。」不變的，是他那10年如一日的不修邊幅髮型：「啱自己嘅就唔好變」，「阿昌」自辯說。找對定位不猶豫，終可覓得新出路。
文：徐嘉嘉
圖：司徒子文