騎士防守籃板 占士最多！
騎士喺NBA主場以105比99擊敗魔術，順利取得開季3連勝，「大帝」勒邦占士取得23分、6個籃板同9次助攻，拍檔艾榮同路夫亦分別攻入20分同19分，三巨頭合共斬下62分，係騎士取勝關健。占士嘅6個籃板球當中，有5個屬防守籃板，累積為騎士取得多達4,021個防守籃板，令佢成為騎士隊史取得最多防守籃板嘅球員。
J.Lin「雙雙」救唔番籃網
另一場賽事，籃網作客以108比110不敵公鹿，林書豪正選上陣33分鐘，取得12分、3個籃板同10次助攻嘅「雙雙」數據，可惜J.Lin全場16投得4中，3分球7次起手只得1中，結果籃網以2分敗陣，開季後暫時得1勝2負。至於金塊主場對拓荒者一役，主隊半場時特別為一代名將莫湯保嘅55號球衣舉行榮休儀式，同時科羅拉多州更宣布將10月29日定為「莫湯保日」，莫大叔認真有江湖地位。
