波癡麥卓賢碌出彩虹

6歲首次接觸保齡，麥卓賢當時只是一個「小豆丁」，直到8歲看到「第一代保齡神童」胡兆康打波，自此對這個運動產生濃厚興趣：「當時見到康仔打波有型又有姿勢，個波碌出嚟好有角度，之後就開始自己鑽研，甚至搵教練上堂學打波。」

自製保齡球 走廊練波

「細個好想擁有一個屬於自己嘅保齡球，9歲生日媽咪送咗一個畀我，當日亦都係我首次正式上保齡球班。」Michael回想兒時學保齡的往事，泛起了笑意。當大部分同齡小朋友都沉醉在玩玩具、砌模型的時候，麥卓賢已經開始研究他的最愛—保齡球。除了平日保齡課程外，家中亦買了小型保齡球樽，每天都坐在走廊模擬打波。「以前好鍾意自己研究，仲用望遠鏡自製保齡球，擺爆旋陀螺舊鐵入去，有時就擺BB彈，因為咁樣發現重心會轉變，仲可以碌到『落西』，碌完一次就親手擺番好啲樽，又再碌過。」每天的生活除了上學，就是保齡。

「我覺得我自己唔係神童，應該係波癡，不過神童都係由波癡起。」憑着對保齡的熱情，Michael 12歲已經入選港隊，2009年第1次代表港隊出戰大型比賽（第一屆亞洲青年運動會），勇奪當時「香港第一金」，最後獲得2金1銀的好成績，光芒綻放。隨後征戰大大小小的比賽，2010和2014年亞運都有獎牌進帳，看似一帆風順，但麥卓賢亦經歷過反叛時期：「贏咗上屆世界盃外圍賽之後，有一段時間好唔想練波，成日遲到，有時直頭唔去練，去世界盃嘅機會當然唔會留畀你。」

慣面對壓力 變得定性

經歷過高山低谷，從前的保齡神童，如今已經22歲，麥卓賢為了最愛的保齡球變身「乖乖仔」。最近狀態大勇的他在亞洲保齡球錦標賽創下港隊新歷史，奪得3金1銀1銅，10月亦準備向世界盃出發，繼續為港爭光。「打保齡影響我好多，15歲開始參加大型比賽，訓練到自己學懂面對不同壓力，好多嘢都可以用平常心面對，個人都定性好多。」雖然Michael的童年與其他小朋友不一樣，但為了最愛，他坦言並不後悔，更希望可以在保齡球場繼續發光發熱！

圖、文：王藝霖