美國「黑仔槍神」埃蒙斯再度與50米步槍三姿冠軍無緣，這名2004年雅典奧運最後1槍射錯隔籬靶痛失金牌，2008年北京奧運最後1槍又射到離晒譜，連續兩屆錯過步槍三姿冠軍的美國運動員，上屆決賽前行人止步，今屆捲土重來結果又再「衰收尾」，於完成兩個姿勢射擊後仍然排在前列，豈料到最後立射時又大跌Watt，最終只排第19，未能進身決賽。
50米步槍三姿於射擊最後一個賽日上演，運動員要順序跪射、臥射、立射三種姿勢進行射擊，每種姿勢射40槍，埃蒙斯在跪射發揮正常，到臥射更加表現超水準，以400環滿環完成，總成績更進入前列。不過，埃蒙斯再度受到「最後一槍」魔咒影響，到立射時又表現失常，最終成績排19慘遭淘汰，繼2012年倫敦奧運後，再一次未能進身決賽。
今屆選擇太太國家捷克出戰的埃蒙斯，賽後表示很失望：「真係好難過，過去兩至三年我為奧運做好準備，尤其對立射制訂咗嚴格嘅訓練計劃，今日射擊時我感覺良好，但電子屏幕顯示9.8、9.9，我真係莫名其妙。」35歲的埃蒙斯仍在考慮是否參戰下屆奧運，但現在他肯定不會選擇退役，10月仍然會出戰意大利的射擊世界盃。他還表示一定會教自己3個仔女射擊，不管他們最終會不會成為運動員，他都想把自己多年來的事業，有人承傳下去。