菲比斯玩直播一樣有金執
菲比斯變fb打手？美國游泳名將菲比斯屬社交網活躍分子，不時喺佢自己嘅戶口發放生活照，最近仲用直播功能同fans分享湊B感受，但有消息指其實佢只係「打工仔」，老闆正正係「fb教主」朱克伯格！可見菲比斯除咗精於贏金牌，玩社交網一樣有「金」執。
據《華爾街日報》透露，擁有18面奧運游泳金牌嘅菲比斯，收取咗「fb教主」朱克伯格20萬美元（約156萬港元）酬勞，於facebook「玩直播」，務求增加網站嘅瀏覽人數。日前菲比斯就直播咗30分鐘，不但畀3個月大兒子Boomer上鏡，更與大家分享佢嘅訓練過程，仲話唔擔心巴西嘅衞生問題。雖然菲比斯某程度上係「網絡打手」，不過喺直播時，佢逐一回答粉絲嘅問題，令大家更加了解佢嘅生活同集訓情況，的確大大縮短與粉絲嘅距離。同時，相信當菲比斯衝金成功，各位粉絲隨時又有live睇啦！
里奧專頁有200萬追蹤者
以往我哋體育新聞嘅來源，主要都係來自傳統嘅媒體例如電視、收音機及報章，但到了今時今日，社交網站如facebook、instagram、Twitter等比重愈來愈高。國際奧委會社交網絡主管胡奧治表示，出席上屆倫奧嘅運動明星如美國泳將羅切特、英國網球手梅萊、美國籃球隊成員高比拜仁、勒邦占士、馬來西亞羽毛球手李宗偉等，喺奧運期間有關佢哋嘅tweet每人高達100萬條，另外重要事件如保特100米奪金，短短幾分鐘已有超過74,000條相關訊息喺Twitter瘋傳，可見社交網絡嘅威力。
至於今屆里約奧運嘅官方facebook專頁，追蹤人數不斷急升，到目前為止已有超過2百萬追蹤者，Twitter的追蹤人數亦高達39萬，而instagram則有25萬人追蹤，數字相當驚人。