on.cc東網直播總決賽Game 3 東方Vs南華再激鬥
「帶傷上場，使乜驚呀！」甲一總決賽愈打愈激，東方、南華在總決賽5場3勝系列戰暫時以1比1打成平手，今晚Game 3絕對是關鍵！東方隊長之一鄭錦興克服傷患，季後賽「打到曉飛」，上場勇奪全場最高28分；南華余理洋上場有傷下後備落場亦狂轟24分，2位「鐵血戰將」再度交鋒，誓要帶領球隊搶Ｗ！頭場永倫與福建上演季軍戰終極一鬥，勝出一方將獲本季季軍。（on.cc東網周一晚8時40分直播）
鄭錦興侵略性快攻更煞食
闊別總決賽戰場7年，鄭錦興今季與東方隊友「拍住上」，以首支升班及職業球隊之姿殺入總決賽，自然希望一舉奪冠，創造歷史！「我覺得依家係好時機，好珍惜每場比賽，始終有7年時間冇真係打過總決賽。」阿興說。
帶傷上陣 拚盡唔錫身
雖然傷患纏身，季初更有跌Watt情況，但這位「甲一流川楓」並沒有放棄，終於在季後賽回勇，上場更「1個打5個」，帶領球隊反勝南華。對於帶傷上陣，但仍然不乏剷籃、衝撞等激爆場面，這位熱血球星並不擔心傷上加傷，他笑說：「呢個係我嘅打法，我自己亦有方法去避免受傷，始終落到場唔會諗太多，只想盡力打好波。」
上場勇奪全場最高28分，鄭錦興十分感謝隊友和教練的信任。「其實呢幾場教練叫我用多啲有侵略性嘅打法，所以博到好多犯規，加上球隊好多快攻都將個波畀我先，係我近呢幾場打得好嘅原因。我哋全隊對總決賽好有信心，東方勝在有好多得分點兼且內外兼備，內線有班尼斯，外線嘅兆榮同阿琪亦好有牽制力。」鄭錦興對一眾隊友信心十足，不但要拿下G3這場關鍵勝利，更希望幫助球隊歷史性奪冠！
壽星仔余理洋望帶旺球隊
今晚除了是總決賽G3關鍵戰，亦是南華後衞余理洋生日大日子！身為壽星仔，Nathan當然想帶旺球隊！「如果今晚贏波，對我同爸爸嚟講，就係最好嘅禮物！」今季在銀牌前一次練習受傷，令余理洋缺席半個球季。目前仍然帶傷上陣，但上仗亦能攻入全隊最高24分，他說：「我隻腳仍然唔係最健康，但一定會喺比賽盡全力去幫助球隊，上場雖然只係後備上陣，不過有機會落場會盡量為球隊帶嚟火花同衝擊。」
檢討失利 加強防守練習
效力南華2年，余理洋今季目標十分明確，就是為球隊及自己取得冠軍獎盃和指環。「上年好接近總冠軍，所以今季我好想幫南華奪冠。即使今季我哋拎到工商盃同銀牌，但如果拎唔到總冠軍，就唔算完滿。」
對於Game 2失利，Nathan坦言會成為今場爭勝動力。經過一輪檢討，發現南華在轉換防守方面做得不夠好，令對手鄭錦興有很多得分機會，球隊之後更加集中在防守方面的練習，希望能在場上有更好的發揮！余理洋對球隊的進攻能力絕不懷疑，深信只要南華發揮水準，在Nathan眼中要贏波絕對不成問題！