桂神最好傾
英雄輝迪高係東方嘅MVP

桂神最好傾：筆者嘅母會東方終於一搔21年之癢，提前一輪重奪本地頂級聯賽冠軍。並非事後孔明，筆者早於今季開咧時，為東網講波曾大膽預測「日出隊」可奪兩項錦標，果然先捧走銀牌，在南華同傑志等班霸嘅圍剿下，連最重要嘅港超聯冠軍都擸埋，真係難能可貴。「日出隊」能重新崛起，班主黎同光應記首功，佢接納前主帥楊正光意見，大灑金錢擴軍令實力大增，其後楊正光進行嘅磨合工作，逐漸為球隊打下奪冠基礎，就算佢已經離隊亦不能忘記。

季中當楊正光離隊到中甲學法，「日出隊」總監梁守志當機立斷提升陳婉婷接任，成為本地頂級聯賽首位女主帥，喺佢帶領下球隊不但平穩過渡，仲榮膺雙料冠軍，「牛丸」功力有目共睹。

至於球員方面，備受球迷愛戴嘅東方隊長兼門神葉鴻輝，當然係重要功臣，不過中場外援迪高亦不容忽視。現代足球防中角色愈來愈重要，而攔截力強嘅迪高除鞏固防線外，亦會喺適當時候入楔埋門，其中銀牌4強對南華落後一球劣勢下，就係靠佢頭槌扳平得以加時，並藉互射12碼掃走勁敵，成為最終捧盃關鍵，若論功行賞，筆者認為佢同「英雄輝」，係「日出隊」今季平頭MVP。