勇士炒火箭咖喱仔傷出

勇士史堤芬居里咁勁，當然成為唔少人嘅偶像同學習對象，美國總統奧巴馬亦睇中呢點，搵「咖喱仔」幫手拍片宣傳一個「社區夥伴計劃」，條片見到奧巴馬同「咖喱仔」互相做大家嘅導師同夥伴，兩個人一齊玩蘋果棋，跟住居里就同奧巴馬研究射術，奧巴馬又教番「咖喱仔」做火山實驗，仲差啲噴到奧巴馬一身都係，條片搞笑得嚟又有意義。

周二Game2未必打得

不過，「咖喱仔」喺場上就冇咁得心應手喇，雖然衞冕嘅勇士喺NBA西岸季後賽對火箭未受考驗，以104比78大勝，史堤芬居里13投8中取得24分，其中5球係三分球，不過由於佢喺完半場前扭傷右腳足踝，結果喺第3戰中段忍唔住被迫退下火線，據勇士主帥卡爾表示，「咖喱仔」Game2上陣成疑，係球隊隱憂。「咖喱仔」將於周一接受進一步檢查，但呢位上屆MVP表示，自己唔希望缺席之後嘅比賽，仲話忍痛上陣冇問題。

火箭嘅夏登今場表現令人失望，喺勇士嚴密防守下，上半場只得4分，全場亦只取得17分，更未曾踏上罰球線。至於賽前被寄望可守住「咖喱仔」嘅比華利，亦未能完成任務，更曾與對方衝突，齊齊被罰技規，次回合火箭要諗諗計，否則隨時吞蛋出局！