各位球迷好呀！我係夢想駿其總監朱偉霖，係呢度首先要多謝各位球迷咁支持呢季嘅港超聯，因為見到好多球迷入場，睇我哋夢想駿其嘅比賽，亦見到好多球迷支持香港足球。
記得喺十幾年前，我踢甲組嘅年代，係香港足球嘅低潮期，直播香港足球好少，報章報道亦好少，入場睇波嘅更加少。我試過有一場比賽只係得4個球迷入場，作為球員，見到咁嘅情況實在覺得好悲哀，因為球員就算花幾多努力、下幾多苦功，都係冇咩人入場睇波，灰！今季我重返職業足球，終於睇到香港人係幾咁鍾意足球呢一項運動，亦比我踢嗰陣多咗好多球迷入場支持，真係好多謝依家為香港足球出力嘅每一個人，亦希望呢一個氣氛可以一路咁延續落去，咁香港足球就會繼續進步。對每個球員或者搞波嘅老闆嚟講，如果冇球迷入場支持，繼續落去都無意思。
最後亦都要多謝今季東網，佢哋為賽事搞宣傳同直播都好落力，希望嚟緊東網同香港足球愈搞愈好，共同努力將香港足球推到最高峰，令香港以外唔同國家及地區嘅人，都可以睇到港超聯，知道香港足球有幾勁！最後，希望各位球圈中人可以繼續喺自己嘅崗位，為推動香港足球努力，多謝大家！
夢想駿其總監 朱偉霖