索爆雙姝欖住上

香港欖運近年大力發展成為體院精英項目，令青少年投身職業運動員有另一選擇，兩位18歲美少女Catherine同Vancy，就因為欖球較其他運動特別而參與其中，各自編織屬於自己嘅欖球夢。

「當初接觸欖球覺得好驚訝，個波竟然唔係圓嘅。」Catherine 3年前偶然見到欖球訓練班海報，抱住試試嘅心態報名，從此欖球成為佢生活一部分。

Catherine受訓唔夠1年，就獲教練提拔代表香港青年軍去日本比賽，依家更係U19主力。「其實我仲未夠好，要更努力訓練，希望將來入體院全職受訓，代表香港出戰。」今次七欖會入場做義工嘅佢仲話：「好開心有機會入場做嘢，能夠同嚟自全球嘅欖球明星近距離接觸，覺得好興奮。」

Vancy比Catherine遲1年加入訓練班，但兩人一見投緣情同姊妹，齊齊效力南華會銅鑼灣欖球會。立志做職業欖球員嘅Vancy，話好多男仔對於佢哋打欖球都覺得驚奇：「女仔打欖球畀人感覺可能有啲粗魯，但亦可以展示女仔強嘅一面，唔同能力嘅球員負責唔同崗位，能夠睇到自己嘅長處同短處。」

每年七欖一票難求，加入本地欖球會有個好處，就係可以優先配飛，已經攞到波飛嘅Vancy笑住話：「到時好多觀眾都會悉心打扮入場，我仲諗緊究竟扮超人定蝙蝠俠邊個好啲。」