《狂舞派》Tasha：跳出我夢想
香港國際七人欖球賽星期五開波，大家準備好未？近年本港欖運發展快，宣傳又多，唔只大隻猛男啱玩，仲吸引唔少靚女透過不同渠道參與。曾參演《狂舞派》嘅美人黃莉雅（Tasha），今年將會聯同一大班嚟自全球各地嘅舞林高手組成打氣團，星期六、日到大球場大跳熱舞搞氣氛，Tasha話入場人士記得同佢打招呼，同埋畀個5佢喎！
打氣團唯一香港代表
香港七欖發展到今時今日已屬一年一度全球盛會，到時大球場真係乜人都有，4萬人一齊又跳又唱，現場氣氛唔使點搞都會好high，不過話晒係大型國際賽，梗係要搵班專業舞蹈表演者現場領跳，咁先至夠盡興，而呢班專業舞者當中，Tasha就係唯一香港代表。
「其實好幸運，七欖係世界大型體育賽事，能加入成為打氣團一分子實在好難得，我讀書嗰陣未做過啦啦隊，估唔到可以做七欖打氣團，有機會喺全場甚至全球觀眾面前表演。」22歲嘅Tasha其實唔係初次喺七欖演出，前年就首次入大球場做啦啦隊，隨後遠赴美國洛杉磯進修舞藝，相隔兩年後重臨大球場，同嚟自全球各地舞者一齊表演。
鼓勵年輕人努力追夢
「上次演出真係好難忘。」Tasha回憶話：「七欖呢個場合，我哋啦啦隊其實毋須培養情緒，一入場氣氛已經好high，最深印象係有個可愛嘅小朋友，見我攞住打氣草球就要我搣一條碎草畀佢。」Tasha仲話會更加落力為港隊打氣：「我同其他成員配合得好好，落力幫球隊加油，而我係香港人，見到香港隊當然要更落力打氣。」
Tasha係末代會考生，畢業後一度覺到迷惘，因為鍾意跳舞而決定入行，到舞室學藝至今6年仍不斷進修，現為全職跳舞導師，並會喺演唱會、舞台劇同電影演出，佢話：「年輕人唔可以放棄夢想，而跳舞就是我嘅夢想，跳舞亦算係體育運動，所以我對運動員係非常尊重。」
圖/文：黃兆崑