李嘉耀與梁冠聰、黃威、馮慶燁、羅港威、方栢倫等「堅家班」子弟兵，自幼隨現時香港飛馬教練李志堅並肩作戰。轉眼超過12年，「嘉耀」依然未覺厭倦，深信兄弟情可隨年月昇華，即使在隊友受傷期間幫手拿尿壺，也不會計較。
昔日黃毛小子逐漸長大，曾被隊友踢爆小時候最百厭的「嘉耀」，亦已變得成熟內斂：「我哋個個性格好唔同，好似冠聰對自己要求好高，栢倫最自信，我同阿軒（南華中場劉卓軒）就因為貪玩，細個畀人罰得最多，但係一落到球場，就可以好自然咁夾到一齊。」
合久必分，10年模範偶像情侶也有別離時，「嘉耀」卻深信彼此默契與兄弟情，毋須界定「保溫期」：「我哋又唔係拍拖，點會咁易厭？況且每季都有新隊友加入，教練戰術亦會有變化，我哋亦會有進步，唔同變化亦已足夠Keep住新鮮感。」雖說不是拍拖，但「嘉耀」笑言好兄弟間的親密程度，猶勝情侶。「黃威受傷期間落唔到床，我有幫手攞尿壺，大家咁多年兄弟，冇所謂啦。就算依家比細個多咗煩惱，我哋都會傾偈分享，開唔開心都會一齊面對。」