「師承」文仔豪豬集麥花臣大成

「聰頭」自幼已與文彼得及鄭少偉（亨利）等屯門元朗區街坊「過招」，多得「亨利」介紹他衝出新界踏足麥花臣，方知天外有天。「當時有機會與招重文、陳志光及蔣世豪等前輩組隊參賽，我同『亨利』算係最後生，負責不斷跑動同追波。佢哋幾乎一腳波都冇傳失，真係要寫個服字，雖然我有跟過地區青年隊受訓，但真係呢個時候先至學到點踢波。」

最大本錢滿場飛

不惜氣力奔跑，也在今日成了「聰頭」在東方防線激烈競爭中的最大本錢。季前熱身賽表現落力，獲得前主帥楊正光及「Madam丸」陳婉婷投下信任票。「楊Sir好肯同球員溝通，不時鼓勵我點樣可以做得更好。『牛丸』當時仲係助教，落手落腳幫我哋設計加操內容，自己都估唔到，到咗呢個年紀，仲有空間可以進步。」