地獄賽程唔係講笑
「地獄賽程」呢四個字，對兩年前身在電視機前，或者觀眾席上嘅我嚟講，既期待又苦惱。期待是因為喺十日八日內會有好多場波可以睇，但又為點先可以睇得晒而第二日仲有精神返工而苦惱！
八日踢三場幸有好團隊
但當投身足球圈之後，就清楚「地獄」呢兩個字果然唔講得笑，因為八日要踢三場比賽真係好唔簡單，每場比賽只是相隔三日，呢三日球員要消除疲勞、治療傷患、保持狀態同練習下場比賽嘅戰術，另外教練團要開會、分析、部署，仲要去指導每一個球員點去應付。對一班球員同教練嘅體力同精神，實在係好大負擔，幸好球會有一班經驗豐富嘅職員，將所有事情一一辦妥，令球員同教練不需要分心，專心向住勝利進發！
嚟緊南華同傑志都要分心亞協盃，東方亦要應付各項已進入淘汰賽階段嘅盃賽，各隊都要畀心機應付地獄賽程！希望往後嘅日子，可以見到更加多球迷入場，支持喺香港為夢想、為目標，用個心喺球場上拚博嘅每位球員！
專欄輪住嚟‧
東方足球隊球會助理 楊振豪