張峰望南華亞協盃快閃出線
南華在本周港超聯兩鬥元朗後，周日（21日）便要踏上亞協盃征途，飛赴緬甸準備下周三作客對仰光聯的G組分組賽。南華上屆在分組賽全勝，成為一時佳話，球隊上下都希望今屆能取得同樣佳績，特別是將榮升第二任父親的「GPS峰」張健峰。
在本地球圈出名是好老公兼廿四孝爸爸的「張峰」，其嬌妻Pecky現正懷孕7個月，預計今年5月中便會誕下兩人第二顆愛情結晶品。被問到太太臨盆在即，還要隨隊南征北討可有心掛掛？
「梗係有啦！不過出外比賽係職業球員工作嘅一部分，我都想幫南華喺亞協盃攞到好成績。依家最理想係頭5場分組賽贏晒，再睇情況，睇吓5月11日作客印度場波，我可唔可以申請免役，因為Pecky預產期係5月16日，我好想嗰段期間可以喺佢身邊。」「張峰」果然係個好老公！
大仔當年等埋老竇返嚟至出世
「張峰」還回想起當年Pecky生大仔Aiden前，他同樣要隨隊出外集訓不在港。「嗰時仲緊張啦！我幾乎每晚都對住老婆個肚講，叫BB聽話一定要等爸爸返嚟先好出世。結果，真係喺我返嚟嗰日，即晚就入院生喇，堅係好神奇。」