絲打，約定你哋一齊！撐港超聯
作為球圈一分子，我Cathy姐姐新一年當然希望球市暢旺，愈來愈多人支持本地波啦！回想去年剛剛入行，之前從未現場看過球賽的我，每次入場都懷着興奮又緊張的心情。採訪港超聯賽事，令我有機會跟各隊球員和球迷接觸，以及欣賞到球員對足球的熱情與認真態度。此外，身為一個典型「港女」，當然最鍾意睇靚仔，港超聯不乏「睇得又踢得」的球員。今年猴年，我希望會有更多「絲打」和我一起撐港超聯，香港足球絕對需要我們的支持！
利馬可愛指數爆晒燈
港超有不少型爆外援，當中我最喜愛是香港飛馬的利馬。這位巴西中場除擁有一雙電眼和逼爆42吋胸肌外，最令我印象深刻是他的控球技術和致命傳送。常常笑面迎人的利馬，更經常大騷其「半鹹淡」廣東話，可愛指數爆燈！他的隊友陳俊樂和效力標準流浪的許嘉樂一樣值得留意，早前在省港盃首回合，兩位小港腳的表現獲各方激讚。他們不僅沒有自滿，更謙虛地表示會繼續努力。至於圈中兩位爸爸級球星，傑志隊長盧均宜及南華的「GPS峰」張健峰，皆是出名的「愛妻號」和廿四孝老竇，各位「絲打」揀男朋友或老公時，一定要以他們做指標呀！
今日猴年大年初一，祝各位球迷好似馬騮仔一樣，精靈活潑，身體健康！各位球員就生生猛猛，遠離傷患。各位「絲打」，約定你們一起撐港超聯，球場見！
文：Cathy
攝：司徒子文