葉頌朗做有學識波牛

脾臟撕裂照去考試

葉頌朗早在中學學界年代已踢出名堂，那些年曾在「學界皇馬」董之英並肩作戰的楊賜麟、翟廷峯、杜瀚滔、黎耀昌等，如今仍在港超默默打拚，但能夠兼顧讀書升上大學，卻唯獨「阿朗」一人。「父母常提醒我追夢係可以，但亦要畀心機讀書。會考10分僅僅讀到中六，到高考也只有2個E。當時身邊好多人覺得我讀完副學士再讀大學，未必可以順利畢業。」

有人用兩個月「完成」大學學位，阿朗付出6年心血方可戴四方帽。不走捷徑，惟有堅持：「有時上晝練完波下晝上堂，好容易瞌眼瞓。好彩這幾年來的教練，像太陽飛馬的Cow Sir（陳志康）及南區與元朗時的馮Sir（馮凱文），對我非常體諒，願意協調操練時間。一班好同學又幫手『jot notes』，同我做past paper補習。我畢業的GPA有2.9幾，都叫過得去啦！」

笑看寒窗苦讀辛酸史，阿朗才醒起自己曾暈倒試場！「有次踢預備組被對手踢到脾臟撕裂，翌日卻是高考模擬試，我睇了急症後偷偷返咗屋企，結果喺試卷寫完個名，就已經痛到暈咗。」一紙證書搵命博，值得嗎？阿朗另有所思：「黎Sir（黎新祥）及曾Sir（曾偉忠）不只一次提醒過我們要為自己定下目標，若足球事業在奧運隊過後冇乜起色，不如早點『休息』。有個學位，轉行亦較易投身社會。不過自己對政府架構同商業管理也有興趣，讀讀下真係開咗竅，依家有時都會額外睇書增值。」

難捨足球棄考督察

阿朗曾立志在大學畢業後投考督察，卻難捨足球情意結，即使近季效力的皇室南區及太陽飛馬也散班收場，始終堅守球場。「現在我的碩士課程一星期才返三晚，已比以前輕鬆好多。」阿朗今季轉投元朗攻入兩球，周日更建功協助球隊「開齋」，將帥上下喜極而泣。這些淚水，有感動，也有痛楚。「其實我在這年半一直也受腿筋發炎困擾，上星期打了支血清針，一拮落去痛到爆炸，唔知痛唔痛得過生仔？」男人最痛也頂得住，更何況讀書壓力。莘莘學子，可別輕易放棄。

圖／文：Kaka