入場睇波體會戰場！

聽好多前輩講，以前會有萬幾、兩萬人入場睇本地波，但係家陣如果有四、五千人入場，已經係好好嘅數字。究竟係咩原因搞成咁呢？有可能係依家科技同資訊發達，香港人打開電視或者電腦，就幾乎可以睇到所有主流聯賽嘅直播，但係唔係因為呢個原因，大家就要放棄香港足球呢？

每個球員落場都係戰士

我想分享一個自己嘅小小經驗，當我第一次喺更衣室，睇到所有人為球賽做準備，每個人都互相鼓勵，有人會講笑又有人會祈禱。物理治療師為球員準備，教練團忙於畀球員賽前指示同分析，一切一切我只能夠用「專業」嚟形容！之後，同球員、教練、職員一齊坐喺後備席參與賽事，個種心情簡直就係熱血沸騰！

每一個球員喺球場上都係一位戰士，佢哋唔會因為畀對方球員撞倒、踢倒而退縮，又或者踢到抽筋而放慢腳步，每一位球員都會作戰到球證吹完場笛一刻為止。球員嘅拚搏同付出，唔係淨係想贏一場比賽，而係要畀入場嘅每一位觀眾，可以欣賞到一場刺激嘅賽事！呢一種感覺，喺電視前面係冇可能畀到你嘅！我真心希望大家入場，去感受一下本地足球。下次有機會，我會再同大家分享。

專欄輪住嚟‧

東方足球隊體能教練 鄭世洺