香港甲一聯賽雖處於休戰期，但近日出現一宗震撼新聞，就係我好朋友潘志豪離開效力了超過十年、贏了不少錦標的永倫，下季轉會加盟新升班的球隊東方。有留意本地籃球的朋友都知道，東方老闆投資過千萬，希望打造一支全職業球隊，這亦是香港史上首次出現的全職業籃球隊，我祝福潘志豪未來可以在東方繼續發光發熱。
今日的「大裕言」會預測新一季各個獎項，得分王就睇好勇士的「咖喱仔」史堤芬居里，相信他今季的得分和3分球，將會再創NBA新紀錄，所以得分王同3分王都非佢莫屬。而籃板王方面，我就睇好東岸活塞中鋒杜蒙特，佢依家打了5場波，平均每場有19個籃板，係活塞防守的絕對主力，所以籃板王同最佳防守球員，我都會「Tip」佢。
至於助攻王方面，我就較為睇好快艇控衞基斯保羅，快艇的實力不錯，加上陣中攻擊點多，基斯保羅只要專注地交出助攻，已經能夠帶領球隊贏波。而今屆MVP心水，當然繼續係我最喜愛的球員「大帝」勒邦占士！事實上，騎士陣中內線主力球員路夫已經復出，球隊實力有增無減，所以今屆總冠軍，我都繼續睇好騎士。
爭持最激烈的，相信都係最佳新人，好多人睇好木狼中鋒唐斯，但我就比較鍾意76人的中鋒奧卡科。上季NCAA賽事，這兩個球員鬥到最後一刻都未知誰會成為新秀狀元，最終唐斯成為狀元，而奧卡科則成為探花。不過，我覺得最佳新人往往會於弱隊上出現，76人係今季NBA的魚腩部隊，奧卡科絕對有充足時間上場表現自己，所以打了5場賽事，平均有接近20分及5.6個籃板，只要繼續落去，贏得最佳新人的機會應較大。
著名籃球評述員 蔡芳裕