追夢!從來唔容易

各位本地波嘅球迷你哋好!我係香港飛馬董事及總監蔡尚圻,闊別咗本地足球壇幾年(曾於2011-12球季贊助公民足球隊),好高興喺呢度同大家再次見面。今年飛馬嘅目標非常明確,李志堅(堅Sir)同幾位有質素嘅外援球員,配合一班有潛質嘅本地年輕球員,希望可以培育得到香港足球的未來;同時以具活力、壓迫性嘅踢法,挑戰各項錦標。

最大回報見證球員成長

好多人都問我點解會再搞波,話香港搞足球吃力不討好、香港足球冇咩人睇、亦唔會有咩回報。其實只要睇到班球員每次努力咁去練習,拚盡全力去比賽,不斷成長,已經係最好嘅回報!

追夢!喺香港呢一個商業社會從來都唔容易,年輕球員喺夢想同生活上要作取捨,有時候物質上可能就比其他工作同齡嘅人簡單一啲,但睇到佢哋喺綠茵場上發光發熱,你就會明白到足球嘅魅力。我喺佢哋嘅眼裏睇唔到「點解」,眼裏就只有「愛」。比賽場上氣勢如虹,慣咗昂首闊步,唔輕易放棄,拚盡每一分力氣去爭取勝利。

現時飛馬以2勝1和得7分位處榜首,雖然只係喺數字上暫時領先,但對於一班年輕球員、重新出發嘅香港飛馬嚟講,已經係極大嘅鼓舞!