扮嘢祖風騷闖關

（now 676周六凌晨零時直播）

祖高域雖已為人父，但個性依然貪玩，今次出戰美網，球場內外都如出Show般搶盡風頭。話說開鑼前夕，他與團隊在中央場訓練期間突然「影帝上身」，假扮發嬲跟友人女伴「搵嗌交」，其實為製造機會給朋友上演一幕英雄救美，最終更求婚成功，開心到「一哥」在旁呱呱叫，「扮嘢祖」更在facebook上載該段視頻祝福一對新人：「好開心能扮演呢個重要角色。」

即使踏入賽場，「扮嘢祖」心情依然未見緊張，他昨日輕鬆以6比4、6比2及6比1淘汰奧地利球手梅里，賽後接受現場訪問時突然邀請一名肥佬粉絲落場齊齊「Fing」衫共舞，兩個「麻甩佬」跳得勁High，場面搞笑！肥佬球迷並為「一哥」着上「I LOVE NY」（我愛紐約）T-shirt，之後仲搭晒膊頭接受全場掌聲。祖高域表示：「我識咗佢五年喇，年年都會有一場比賽見到佢除衫跳舞，佢帶到好多歡樂畀大家！」

失準拿度贏得險

同日西班牙「天王」拿度雖然送出四十次失誤，幸仍以7比6（7比5）、6比3、7比5力克阿根廷的積遜舒華斯曼打入第三圈，反觀「舒娃前男友」迪米杜夫就以盤數2比3不敵哈薩克古古舒堅，六十四強止步。女單方面，力爭「單季全滿貫」S威廉絲面對荷蘭貝婷絲贏得略帶驚險，首盤「搶七」逆轉後才以7比6（7比5）及6比3涉險入第三圈。