「香港90後車神」方駿宇（Adderly）銀石之旅上了寶貴一課！他日前在GP3英國站排位賽造出今年最佳的第7位，惜未能將狀態延續到兩回合賽事，分別以第12及14名完成，已是開季以來綜合最佳名次，Adderly賽後坦承成績麻麻，難免失望，幸在賽道上體驗不少，可謂輸車贏經驗！他期望下一站再有進步。
方駿宇於英國時間周六傍晚舉行的首回合，由第7位起步，惟起步時發生失誤，令排名下跌，第2圈出彎時再度出錯，跌落第12位，之後發力狂追都未能扭轉劣勢，只能以第12名完成英國站首戰。昨日舉行的次回合，「港產車神」於第12位起步時仍是不順，最後僅得第14名，開季3戰過後仍未有分落袋。
儘管對表現失望，但Adderly賽後表示今站學會了不少新事物。他說：「今次成績唔係太好，但都係學輪胎管理，因為F1對養胎嘅要求更大，所以都學到嘢。」以現時3戰成績而言，今站無論排位及完成位置都是今年GP3最佳成績，不過Adderly未有自滿：「今次係3場最好，不過仲有好大嘅進步空間。今次排位係有少少進步，但最緊要嘅都係比賽成績。」
Adderly兩場正賽都未能造出更好成績，他効力的Koiranen GP「型佬」領隊蘇文（Jan Sumann）都「戥佢唔抵」。蘇文說：「佢排位賽表現得好好，可惜唔能夠將表現帶到兩場正賽。希望佢下場可以再排到個好位，之後就成功打入前10攞到分啦！」蘇文又大讚Adderly：「我好鍾意佢好似冇乜壓力嘅態度，佢對於高速彎嘅處理係有一手，今年餘下賽程都仲有幾條高速賽道畀佢發揮。喺精神層面上，佢係唔錯，只係技術層面上仲要繼續努力。」Adderly今日將會到牛津大學體育大學進行體能訓練。