傑志先頭部隊惶恐過關
印尼政府徹查印尼足總涉嫌挪用500萬美元國家資助，事件鬧大，國際足協介入，現時印尼國內聯賽停晒，超過四十支聯賽隊伍的職、球員腳停口停，就連外國球隊都受牽連！馬來西亞彭亨首當其衝被拒入境，而傑志「先頭部隊」則在誠惶誠恐下抵達萬隆，但周三作客鬥萬隆的亞協盃16強賽有無受影響，有待今日大軍入境才有分曉！另外，傑志出發前獲前主帥狄恩「過料」，作客爭勝，機會大增！
今晨才由香港出發經新加坡到萬隆的傑志，包括助教盧比度、龍門教練羅拔圖和傳媒主任Simon的「先頭部隊」昨日先行，在新加坡後等候轉機時，突然傳來令人擔憂嘅消息，於G組次名出線嘅馬來西亞球隊彭亨，周六早上飛抵印尼雅加達機場，準備周二對佩西普拉16強賽事。惟彭亨大軍，同亞洲足協嘅官員、監場，一律被拒絕入境，個別外援球員更遭通宵扣查，事件擾攘一日之後，有關人士全折返，並有傳周二之戰取消，彭亨不戰而勝。
傳賽事取消彭亨不戰而勝
傑志獲悉後不斷向有關方面了解最新情況，又向前傑志亞援、現効力彭亨的列文收料，盧比度表示：「都無辦法，都要飛咗過去先知，希望無太大問題啦！」 之後經過個半鐘航程，傑志「先頭部隊」終懷住戰戰兢兢嘅心情，抵達印尼萬隆。落機前大家都已經作咗最壞打算──即晚返港。
排隊辦理簽證同等候過關嗰陣，眾人都一臉愁容，直至順利過關後，盧比度同羅拔圖先有番晒笑容，更不斷同前嚟迎接嘅萬隆職員吹水講笑，萬隆職員亦唔見有何異樣。「真的鬆了一口氣，希望大軍聽日（周一）到嗰陣，都係咁順利啦！」盧比度笑晒口咁講。傑志大軍預計今日香港時下午5點抵達萬隆，之後立即去練波。
狄恩：萬隆備戰差 傑志有得打
於05至08年執教過傑志的狄恩，因印尼聯賽被政府全面叫停，在下月初返回家鄉塞爾維亞前，先來港與妻兒及昔日戰友敍舊。「我都唔知會停幾耐，國際足協已經介入，到本月29日便會有調查結果，不排除印尼足總會被禁賽，國家隊同連競逐亞協盃嘅球隊，好似萬隆都會受到牽連！」
聯賽叫停主隊狀態成疑
狄恩稱：「萬隆和我執教的柏列達查耶（Pelita Bahdung Raya）屬同一個老闆，所以我對佢哋好熟悉，雖然萬隆係上季聯賽冠軍，但就兩度被我嘅球隊擊敗。佢哋擁有好高質嘅塞爾維亞同喀麥隆外援，7至8個印尼國腳。主場可坐6萬人，綽號『維京人』嘅萬隆球迷，既熱情又團結, 對傑志嗰晚我估計超碼會有35,000或以上嘅球迷入場！」
不過，狄恩就覺得今仗運氣在傑志一方，並預期周三之戰將屬「五五波」：「聯賽停咗亦令萬隆缺乏比賽狀態，對傑志前只係同峇里聯同雪蘭峨踢過熱身賽，備戰同傑志比較，輸蝕好多。」狄恩補充：「萬隆的兩名塞爾維亞外援，分別因停賽未能趕及註冊踢而未能披甲，只有喀麥隆中場10號的Konate可用，雖仍有7名印尼國腳，但實力已大打折扣！」
狄恩在印尼執教的前途未卜，會否因而考慮重返香港球壇呢？曾在港執教傑志、天水圍飛馬、沙田、大中、屯門，以及香港隊的狄恩坦言，一直希望能再次執掌港隊帥印，只要機會來臨，不排除有一天會回到他第二個家鄉──香港。
狄恩執教威水史
球隊 年度獎項
傑志(香港) 05-06球季最佳教練
阿雷馬(印尼) 11-12球季最佳教練
普洛杜塔(印尼) 12-13球季最佳教練
柏列達查耶(印尼) 13-14球季最佳教練
（只列部分）