卸下「緊箍咒」 大帝變身「助攻王」
勒邦占士卸下「緊箍咒」即做「助攻王」！「大帝」昨日一反常態，事隔12年後首度不戴頭帶正選落場，結果即攻入全場最高的27分，帶領騎士作客以127比94大勝小牛之餘，更「升呢」做騎士「助攻王」，證明占士這個造型為他帶來好運。
1.3億豪宅放盤冇人吼
據《紐約郵報》爆料，今季回巢騎士的占士，將其邁阿密豪宅掛牌1,700萬美元（約1.3億港元）放售，奈何因地段「唔就腳」，掛牌半年一直無人問津。可能心煩，占士決定卸下「緊箍咒」，自新秀賽季鬥活塞一役後，昨日首度不戴頭帶正選落場，隨即惹來網民熱議，當中不少人繼續以「大帝」的髮線做笑柄，又揶揄該球星似足露宿者。
不過占士一於少理，昨仗貢獻「27+7+8」，加上全隊共有5位球員得分達雙位數，騎士終以33分大勝小牛。「大帝」亦累積交出4,214次助攻，超越名宿馬克派斯（4,207次）成為騎士球隊史上的「助攻王」。
同日，湖人雖於主場以93比85擊敗活塞，然而塘鵝於另邊廂贏波後直接判湖人「死刑」，令「紫金兵團」搬竇到洛杉磯以來，第7次無緣季後賽。