筆者首先喺度同《東方體育》嘅讀者拜年，祝大家身體健康，洋洋得意。羊年雖然有多日假期，但CBA球員就不會有這麼多假放，因為年初七（25日）「人日」將會上演CBA季後賽四強戰，首日賽事由4號種子北京主場對1號種子廣東，次日（26日）就由3號種子青島主場對2號種子遼寧。四強戰賽制將會係5局3勝制，排名較低球隊先於主場出戰，之後兩仗作客，第4仗重返主場，最後一仗則作客。
北京與廣東這個對碰可說是歡喜冤家，上季北京於4強戰贏廣東3比2，更於決賽成功捧盃，廣東今次可以話係上演復仇戰。兩隊實力其實非常平均，廣東同北京陣中都有兩位NBA級數外援，前者係韋爾拜林同謝夫阿祖安，後者係馬貝利同摩利士，再加上兩隊都有一名打過NBA的本土球員，分別係廣東的易建聯同北京的孫悅，相信今仗會鬥得非常精彩，隨時要打足5場先會分到勝負，筆者則稍為看好廣東可以贏波。
至於遼寧同青島就會上演內線比併，遼寧陣中有筆者認為係本土最好的中鋒韓德君在陣，加上後衞郭艾倫及外援侯遜，令球隊表現突飛猛進取得常規賽第2名。青島則以三外援陣應戰，包括曾經打過NBA的伊朗中鋒夏達迪，筆者認為今仗會係內線大鬥法，但就略為看好青島可以總場數3比2過關。
大裕言
永倫籃球隊教練 蔡芳裕