馬體會專門店開遍神州

馬德里體育會同拜仁慕尼黑分途進軍中國市場!馬體會早前獲中國富豪王健林收購20%股份,現時準備未來幾個月喺王氏旗下200幾間萬達廣場內開設專門店,可望一舉成為國內市場覆蓋率最大嘅歐洲球會。拜仁則將於今夏訪華,踢兩場熱身賽賺「人仔」。

西班牙《阿斯報》指王健林銳意將馬體會打造成最受中國人歡迎嘅外國球隊,幫呢支上季西甲冠軍喺各個萬達廣場開設專門店,除咗出售球隊相關產品,仲會成為球迷聚會嘅地方,加強內地fans同球星嘅互動聯繫,勢必大大提升馬體會喺中國嘅影響力,創造無限商機。

拜仁今夏訪華友賽

至於拜仁慕尼黑亦對中國市場虎視眈眈,講明將於今夏訪華,踢兩場熱身賽,最大機會去北京同上海。未來日子會重點開發中國市場,包括設立網購平台,令中國fans可於48小時內收到網購產品,但就無意簽中國球員。