晒命青訓搞得出色
南華嘅阿根廷籍體能教練加列特為一班國腳去完旺角買Game後，返到酒店又同紐維爾舊生會長洛倫迪（Dr. Guillermo Lorente）見面，兩個阿根廷佬他鄉遇故知，講到雞啄唔斷。洛倫迪隨和熱情，佢接受本報記者訪問時晒命話球會已經成為國家隊搖籃，輸出品包括美斯等世界星級國腳！
洛倫迪第一次嚟香港，勁讚呢粒「東方之珠」好靚。佢話當年美斯仲喺舊生青訓嗰陣，因為賀爾蒙生長素分泌不足，一直都好細粒。洛倫迪雖然知道佢有好高足球天分，但係都幫佢唔到，最後只可以將佢讓畀巴塞隆拿，就係咁成就咗佢球王之路。
國家隊巨星搖籃
洛倫迪被問及球會發展狀況時，即時晒命話球會已經成為國內一流勁旅，多名國腳好似美斯咁，都係紐維爾舊生出品。依家球會繼續大力搞青訓，仲起咗幾間足球學校，學員可以一邊讀書一邊訓練，效果非常理想。
佢仲講到依家班波有28至30名球員，球員月薪由1萬美元起跳，以南美球會嚟講，已屬富豪級數。