粉絲不甘食白果 上樓「衝擊」戰實Q
阿根廷踢完場波就走人，球星們仍然神神秘秘未出過嚟，一班粉絲在酒店捐窿捐罅都冇料到，終於按奈不住，成班搭電梯「直搗黃龍」，衝擊球星入住嘅8樓防線，不過卻被保安以太極手直推返入電梯，無功而還。本報前日直擊馬斯真蘭奴做Gym後，酒店保安明顯加強，住客必定要出示房卡才可進入電梯大堂範圍，健身室及泳池等亦加強巡查。
不過，由於只有迪馬利亞簽過幾個名，好多粉絲都不甘空手而回，想盡辦法去親近球星。有球迷就趁大軍於1樓用膳時，打算利用後樓梯「潛入」1樓，可惜好快被保安發現，結果落荒而逃。
遊電梯河博「偶遇」
另有一批球迷逐層搜索，或遊電梯河，希望可以「偶遇」心儀球員。佢哋後來得知大軍入住8樓，就試圖衝擊。有球迷笑說，離目標咁近，一定要闖闖，就搭電梯去8樓。電梯門打開時見冇人把守，兩名球迷就膽壯起嚟行出走廊，點知行唔夠幾步就「見光死」，遭兩名保安攔截，用太極手將佢推返入電梯。
不過，亦有成功集郵例子，有球迷見到本報影到馬斯真蘭奴健身，亦於健身房做Gym等「小馬哥」，最終畀佢成功埋身合照，恭喜晒！