球星悶爆手痕話要打機 求記者帶路買Game

阿根廷大軍來港後除操練外，一直留守喺酒店，唔知係咪太過悶爆，手痕想打機kill time，但又冇Game喺手，於是有球星叫助教Paolorroso問南華助教同鄉加列特求救，想佢代買新足球Game《FIFA15》，駐守現場嘅本報記者最後仗義出手，幫阿根廷球星買Game解悶。
本報記者（右）臨危受命，帶埋加列特飛的落旺角。
本報記者（右）臨危受命，帶埋加列特飛的落旺角。

踢爆美斯係爛瞓豬

成支阿根廷留喺酒店，香港咁多景點都冇得去玩，實在嘥料，但原來美斯話瞓覺好過四周去，阿根廷助教Paolorroso同前來酒店探班的南華助教加列特玩whatsapp，透露美斯原來係「爛瞓豬」，早上11點仲未起身，下午再問多次，又話瞓緊晏覺，真係好瞓得喎！

Paolorroso突然提出請求，就係想即刻買《FIFA15》嘅足球game，問加列特香港邊度有得買，雖然呢隻game係由美斯做代言人，但原來佢自己竟然冇喺手，於是焗住向外「江湖救急」，其實加列特今季才加入南華教練團，對香港都唔係太熟，本報記者見狀當然要幫手，仲帶埋加列特去入貨。

到達Game舖，好彩有現貨，安樂晒！
  • 到達Game舖，好彩有現貨，安樂晒！
老闆娘知道客仔原來係阿根廷球星，都好開心。
  • 老闆娘知道客仔原來係阿根廷球星，都好開心。

江湖救急飛的落旺角

由於黃埔百貨公司冇貨，記者帶住加列特「飛的」去旺角game舖買，Paolorroso要咗個PS3版本，盛惠398蚊，結果當然係順利完成任務，返回酒店送畀Paolorroso，仲送多件南華波衫畀佢添。

加列特幫咗阿根廷球星大忙，重重有賞，獲得美斯親筆簽名球衣，真係恨死隔籬。
  • 加列特幫咗阿根廷球星大忙，重重有賞，獲得美斯親筆簽名球衣，真係恨死隔籬。
好波皆因瞓得多，美斯竟然係「睡魔」！
  • 好波皆因瞓得多，美斯竟然係「睡魔」！