仁川亞運就快閉幕，港隊項目玩得七七八八，每天泡菜杯麵加烤肉嘅日子亦快將結束，至於小弟在今屆賽事有乜收穫，相信大家都唔會有興趣知，不如講番共同話題，就係韓妹。
由於早前跟過天梭團，有當地導遊帶住知多好多，其實導遊講咗好多嘢，但我條天線淨係接收到同韓妹有關的事，明明瞌緊眼瞓都好自然豎高耳仔留心聽書，如此反應亦好正常，你懂的。
先講整容，南韓是整容大國，收費平又專業，割雙眼皮、隆鼻、割酒窩濕濕碎，導遊話韓妹本來唔係咁樣，但整容太普通，所以依家個個望落去都幾順眼。
另一件好普通嘅事就係相睇，雖然南韓個個大男人，但韓妹亦非省油的燈，佢哋相睇會問三條問題：第一，做乜職業，如任職大機構優先；第二，住邊區，江南區會加分；第三亦係最重要，是否家中長子，如果係長子，個女仔可能掉頭走，原來南韓傳統長子要同父母一齊住，又唔會請「賓賓」，因為長子個老婆就係「賓賓」，畀着係你都閃啦！
記得港足主帥金判坤有次同小弟吹水，佢話南韓人留喺南韓先係大男人，來到香港生活，老婆沾染到港女習性，依家佢掉翻轉要服侍老婆添喎！