初抵仁川時，見到周圍都係地盤，亞運會主新聞中心及中央公園一帶，更係新開發區，有新樓盤亦有爛地，好自然就會同香港比較，心想仁川樓市相信幾旺。
早前天梭團遊仁川，帶團導遊Cat（化名）解開小弟心中唔少疑問，對南韓人生活有進一步認識。Cat係香港人，嫁過來南韓，佢知港人對樓市好敏感，就同大家講解咗好多南韓樓市現象。
原來南韓人唔興買樓，因為樓價受政府干預，首期要畀五成以上，普通家庭多數買唔起，成交量亦低，平民百姓都係鍾意租樓住，由於受政策影響，租金好平，例如首爾市中心地段一個千呎單位，租金唔會高過200萬韓圜，大約15,000港紙，市郊租金就平一半。
南韓仲有個規矩，就係畀按金愈多，租金愈平，舉例有業主開出8,000萬韓圜按金，港紙大概50幾萬，咁就可以免畀租無限期入住，搬出又可以拿回按金，係咪好着數先？
至於現時用作選手村同傳媒村嘅樓盤，將來亦會變成住宅，由發展商出租畀當地人入住，依家就梗係由我哋住住先啦！
馬田＠仁川