一直唔明，南韓並非首次搞大賽，86年及88年辦過「漢城」亞運同奧運，02年又搞過世界盃及釜山亞運，今屆是南韓第三次辦亞運會，理應駕輕就熟，事實卻係相反。
田徑場館氣氛冷落
聖火熄過、班車疏落、職員對傳媒無禮、運動員食物污染，幾乎日日都出現問題，不過最弊係各場館吉位處處，例如已經結束的游泳項目，賽會聲稱門票一早售罄，但看台上只有一半入座率，至於呢幾日進行的田徑情況更嚴重，6萬人場館幾乎全部吉位。
早前去過首爾明洞及弘大兩個遊客熱點，完全搵唔到仁川亞運的宣傳，可見南韓人自己都唔撐。賽事仲有唔夠一個禮拜就完，盡快埋尾，或者對仁川係一種解脫。
馬田@仁川